நீங்கள் தேடியது "பெரம்பலூர் கலெக்டர் அலுவலகம்"

பெரம்பலூர்:

பெரம்பலூர் மாவட்ட கலெக்டர் அலுவலகத்தில் விவசாயிகள் குறைதீர்க்கும் நாள் கூட்டம் நேற்று நடந்தது. கூட்டத்திற்கு கலெக்டர் சாந்தா தலைமை தாங்கி விவசாயிகளிடம் இருந்து கோரிக்கை மனுக்களை பெற்று கொண்டார். கூட்டத்தில் அகில இந்திய விவசாய தொழிலாளர்கள் சங்கத்தின் மாவட்ட செயலாளர் ரமேஷ் பேசுகையில், படைப்புழு தாக்குதலினால் பெரம்பலூர் மாவட்டத்தில் விவசாயிகள் பயிரிடப்பட்டுள்ள மக்காச்சோள பயிர்கள் பெரிதும் பாதிக்கப்பட்டுள்ளது. எனவே தரமற்ற மக்காச்சோள விதைகளை விற்ற நிறுவனங்கள் மீது மாவட்ட நிர்வாகம் வழக்கு தொடர்ந்து விவசாயிகளுக்கு நிவாரணம் பெற்றுத்தர நடவடிக்கை எடுக்க வேண்டும். மேலும் படைப்புழுவினால் பாதிக்கப்பட்டுள்ள மக்காச்சோள பயிர்களுக்கு ஏக்கருக்கு ரூ.25 ஆயிரம் அரசிடம் நிவாரணமாக வாங்கி தர மாவட்ட நிர்வாகம் நடவடிக்கை எடுக்க வேண்டும்.

போதிய மழை பெய்யாததாலும், படைப்புழுவாலும் பாதிக்கப்பட்டுள்ள விவசாயிகளுக்கு அவர்கள் வங்கிகளில் வாங்கியுள்ள விவசாய கடன்களை தள்ளுபடி செய்ய வேண்டும். 100 நாள் வேலை திட்டத்தில் நடைபெறும் முறைகேடுகள் மீது நடவடிக்கை எடுக்க வேண்டும். கால்நடைகளுக்கு தீவனமாக மாவட்டத்தில் அதிகமாக உள்ள மக்காச்சோள தோகைகளை மாவட்ட நிர்வாகமே கொள்முதல் செய்து விற்பனை செய்யலாம் என்றார்.

தமிழ்நாடு விவசாயிகள் சங்கத்தின் பெரம்பலூர் மாவட்ட செயலாளர் செல்லத்துரை பேசுகையில், எறையூர் சர்க்கரை ஆலை மூலமாக கரும்பு விவசாயிகளுக்கு வழங்கப்பட வேண்டிய பாக்கி தொகையினை ரூ.31 கோடியே 93 லட்சம் விரைந்து வழங்க நடவடிக்கை எடுக்க வேண்டும். பெரம்பலூர் மாவட்டத்தில் விவசாய நிலங்களுக்கு மின்சாரம் வழங்கப்படும் மின்மாற்றிகள் அடிக்கடி பழுதாகிறது. அதனை பழுது செய்ய கால தாமதம் ஆகுவதால் நிலங்களுக்கு தண்ணீர் பாய்ச்ச முடியாமல் விவசாயிகள் தவித்து வருகின்றனர். எனவே பெரம்பலூர் நான்கு ரோட்டில் தமிழ்நாடு மின் பகிர்மான கழகத்தில் மின்மாற்றிகளை பழுது செய்ய தொழில் பிரிவு பணிமனை தொடங்குவதற்கு நடவடிக்கை எடுக்க வேண்டும். சின்னமுட்லு நீர்த்தேக்கம் விரைவாக அமைப்பதற்கு மாவட்ட நிர்வாகம் நடவடிக்கை எடுக்க வேண்டும் என்றார்.

தமிழ்நாடு பாமாயில் மர சாகுபடியாளர்கள் சங்கத்தின் மாநில தலைவர் முருகேசன் பேசுகையில், அதிகமாக பால் உற்பத்தியாகும் பெரம்பலூர் மாவட்டத்தில் பால் உற்பத்தி ஒன்றியம் அமைக்க நடவடிக்கை எடுக்க வேண்டும், மாவட்ட பத்திரவு பதிவுத்துறை அலுவலகம் திறக்க வேண்டும். மக்காச்சோளத்திற்கு ஆராய்ச்சி மையம் அமைப்பதற்கு மாவட்ட நிர்வாகம் நடவடிக்கை எடுக்க வேண்டும் என்றார். தமிழ்நாடு கரும்பு விவசாயிகள் சங்கத்தின் மாநில துணை செயலாளர் ராஜேந்திரன் பேசுகையில், போதிய அளவு மழை பெய்யாததால் பெரம்பலூர் மாவட்டத்தை வறட்சி மாவட்டமாக அறிவிக்க வேண்டும். அறிவிக்கப்படாத மின்வெட்டை தடுக்க வேண்டும் என்றார்.

தமிழக விவசாயிகள் சங்கத்தின் மாநில செயலாளர் ராஜா சிதம்பரம் பேசுகையில், சுமார் 65 ஆயிரம் ஏக்கரில் பயிரிடப்பட்டுள்ள மக்காச்சோள பயிர் படைப்புழுவினால் பாதிக்கப்பட்டுள்ளது. இதுவரைக்கும் அரசிடம் நிவாரணம் கேட்டு 10 ஆயிரத்துக்கும் மேற்பட்ட விவசாயிகள் மாவட்ட நிர்வாகம் மூலம் மனுக்கள் அளித்துள்ளனர். எனவே உடனடியாக விவசாயிகளுக்கு நிவாரணம் அரசிடம் இருந்து பெற்று தர வேண்டும். பெரம்பலூர் மாவட்டத்தில் அனைத்து கிராமங்களுக்கு காவிரி குடிநீர் வழங்க வேண்டும் என்றார்.

இதையடுத்து கலெக்டர் சாந்தா கூட்டத்தில் பேசுகையில், விவசாயிகள் மாற்று பயிர்களாக உளுந்து பயிர்களை சாகுபடி செய்யவும், மக்காச்சோள பயிரில் படைப்புழு தாக்குதல் அதிகமாக இருப்பதால் வேளாண் துறையினர் மூலமாக கள ஆய்வு செய்து பாதிக்கப்பட்டுள்ள பகுதிகள் குறித்து கணக்கெடுப்பு செய்து நிவாரண நிதி வேண்டி அறிக்கையினை வேளாண்மை இயக்குனரகத்திற்கும், வருவாய்த்துறை ஆணையருக்கும் சமர்ப்பிக்கப்பட்டுள்ளது. மேலும், சின்ன முட்லு அணை கட்டுவதற்கு தக்க நடவடிக்கை எடுக்கப்படும் என்றார்.

இதில் மாவட்ட வருவாய் அதிகாரி அழகிரிசாமி, வேளாண்மை இணை இயக்குனர் (பொறுப்பு) கலைவாணி, வேளாண்மை துணை இயக்குனர் (உழவர் பயிற்சி நிலையம்) சந்தானகிருஷ்ணன், ஊராட்சிகள் மற்றும் தணிக்கை உதவி இயக்குனர் பாரதிதாசன் மற்றும் மாவட்ட அளவிலான அலுவலர்கள் கலந்து கொண்டனர்.  #tamilnews

பெரம்பலூர்:

பெரம்பலூர் மாவட்ட கலெக்டர் அலுவலகத்தில் பொதுமக்கள் குறைதீர்க்கும் நாள் கூட்டம் நேற்று நடந்தது. கூட்டத்திற்கு கலெக்டர் (பொறுப்பு) அழகிரிசாமி தலைமை தாங்கி, பொதுமக்களிடம் இருந்து கோரிக்கை மனுக்களை பெற்றார். அப்போது வேப்பந்தட்டை தாலுகா அயன்பேரையூர் ஆதிதிராவிடர் தெருவில் வசிக்கும் 100-க்கும் மேற்பட்ட பெண்கள் வந்து இலவச வீட்டுமனை வழங்கக்கோரி கலெக்டர் அலுவலகத்தை முற்றுகையிட்டு போராட்டம் நடத்தினர். அப்போது அப்போது பாதுகாப்பு பணியில் இருந்த போலீசார், அவர்களிடம் பேச்சுவார்த்தை நடத்தினர். பின்னர் அவர்களில் 5 பேரை மட்டும் கலெக்டரை சந்தித்து மனு கொடுக்க போலீசார் அனுமதி கொடுத்தனர். இதையடுத்து இலவச வீட்டுமனை வழங்க மாவட்ட நிர்வாகம் நடவடிக்கை எடுக்க வேண்டும் என கலெக்டர் அழகிரிசாமியிடம் ஒரு மனு கொடுத்து விட்டு கலைந்து சென்றனர்.

ஆலத்தூர் தாலுகா இலுப்பைக்குடியை சேர்ந்த பால் உற்பத்தியாளர்கள் கொடுத்த மனுவில், கூத்தூர் தொடக்க வேளாண்மை கூட்டுறவு வங்கி மூலமாக கறவை மாட்டு கடனாக 20 நபருக்கு தலா ரூ.90 ஆயிரம் வழங்க கடந்த 2017-ம் ஆண்டு ஏப்ரல் மாதம் அரசு அனுமதியளித்தது. அதில் தலா ரூ.45 ஆயிரம் வீதம் 20 பேருக்கு வழங்கப்பட்டது. இதற்கு பங்குதொகையாக எங்களிடம் தலா ரூ.9 ஆயிரம் வீதம் கூட்டுறவு வங்கி மூலம் வசூலிக்கப்பட்டது.

ஆனால் ஒரு தவணை கறவை மாட்டு கடனை கொடுத்து விட்டு 20 மாதம் ஆகியும், அடுத்த தவணை கறவை மாட்டு கடனை வழங்கவில்லை. ஆனால் பால் பண்ணையில் எங்களுக்கு 2 தவணை மாட்டு கடன் வழங்கியதாக கூறி, ஒரே மாதத்தில் ரூ.3 ஆயிரம் வீதம் பிடித்து செய்து வருகின்றனர். இதுகுறித்து மாவட்ட நிர்வாகம் நடவடிக்கை எடுக்க வேண்டும் என்று கூறியிருந்தனர்.

மேலும் பொதுமக்கள் குறைதீர்க்கும் நாள் கூட்டத்தில் முதியோர் உதவித்தொகை, மாற்றுத்திறனாளிகள் உதவித்தொகை, பட்டா மாற்றம், தொழில் தொடங்க கடனுதவி, வேலைவாய்ப்பு, வீட்டு மனைப்பட்டா கோருதல் உள்பட 367 மனுக்களை கலெக்டர் அழகிரிசாமியிடம் பொது மக்கள் வழங்கினர். மனுக்களை பெற்று கொண்ட கலெக்டர் சம்பந்தப்பட்ட அலுவலர்களிடம் மனுக்களின் மீது தக்க நடவடிக்கை மேற்கொள்ள வேண்டும் என அறிவுறுத்தினார். பின்னர் கடந்த ஜூலை மாதம் சென்னை, பரங்கிமலை ரெயில் நிலைய பக்கவாட்டு சுவர் மோதி படுகாயமடைந்த குன்னம் தாலுகா, லப்பைக்குடிக்காட்டை சேர்ந்த முகமதுயாசருக்கு முதல்-அமைச்சர் பொது நிவாரண நிதியில் இருந்து ரூ.50 ஆயிரத்திற்கான காசோலையை கலெக்டர் வழங்கினார். அப்போது தனித்துணை கலெக்டர் (சமூக பாதுகாப்புத் திட்டம்) மனோகரன், உதவி இயக்குனர் (ஊராட்சிகள்) பாரதிதாசன் உள்பட பலர் கலந்து கொண்டனர்.  #tamilnews

பெரம்பலூர்:

பெரம்பலூர் கலெக்டர் அலுவலகம் முன்பு வறட்சியால் பாதிக்கப்பட்ட பயிருக்கு ஏக்கருக்கு ரூ. 25 ஆயிரம் நிவாரணம் வழங்கவேண்டும் என வலியுறுத்தி விவசாயிகள் விளைச்சல் பாதிக்கப்பட்ட மக்காசோள பயிருடன் ஆர்ப்பாட்டம் நடத்தினர்.

ஆர்ப்பாட்டத்திற்கு தமிழக விவசாயிகள் சங்க மாநில செயலாளர் ராஜாசிதம்பரம் தலைமை வகித்தார். மாவட்ட செயலாளர் நீலகண்டன், நிர்வாகிகள் வேணுகோபால், செல்லதுரை, வரதராஜன், புஷ்பராஜன், மணி ஆகியோர் முன்னிலை வகித்தனர். கரும்பு விவசாயிகள் சங்க மநில துணை செயலாளர் ராஜேந்திரன், தமிழக ஏரி மற்றும் ஆற்றுநீர்பாசன விவசாயிகள் சங்க மாநில தலைவர் விசுவநாதன் உட்பட பலர் கோரிக்கைகளை நிறைவேற்ற வலியுறுத்தி பேசினர்.

இதில் அமெரிக்கன்படை புழு தாக்குதலினால் 50 சதவீதத்திற்கு மேல் விளைச்சல் பாதிக்கப்பட்ட மக்கா சோளத்திற்கு வறட்சியால் காய்ந்துபோன கரும்புக்கும் பிரதம மந்திரி வேளாண் காப்பீடு திட்டத்தின் பயிர் காப்பீடு செய்த மற்றும் பயிர் காப்பீடு செய்யாத விவசாயிகளுக்கும் ஏக்கருக்கு ரூ.25 ஆயிரம் நிவாரணம் வழங்க வேண்டும். படைப்புழு தாக்கத்தை உடனடியாக கட்டுப்படுத்தவேண்டும்.

மக்காசோளத்தில் படைப்புழு தாக்கத்தின் காரணமாக அருகில் சாகுபடி செய்துள்ள வெங்காயம், நெல், கரும்பு, பருத்தி உள்ளிட்ட பயிருக்கும், அதே படைப்புழு தாக்கம் ஏற்படாமல் ஆய்வு செய்து படைப்புழுவினால் கட்டுப்படுத்திட அரசு நடவடிக்கை எடுக்க வேண்டும், பிரதம மந்திரி வேளாண் பயிர் காப்பீடு திட்டத்தின் கரும்புக்கு காப்பீடு செய்த விவசாயிகளுக்கும், காப்பீடு செய்யாத விவசாயிகளுக்கும் காய்ந்து போன கரும்பு பற்றி கணக்கு எடுத்து நஷ்ட ஈடாக ஏக்கருக்கு ரூ.40 ஆயிரம் தமிழக அரசு இயற்கை இடர்பாடு நிதியிலிருந்து வழங்க வேண்டும் என கோ‌ஷமிட்டபடி, படைப்புழு தாக்குதால் விளைச்சல் பாதிக்கப்பட்ட மக்காச்சோள பயிருடன் சாலையில் அமர்ந்து விவசாயிகள் ஆர்ப்பாட்டத்தில் ஈடுபட்டனர்.